နန်းကျဘုရင်ဘရုစ်ဟာ တောတောင်ထဲမှာ
ပုန်းအောင်းပြီး လူသူစုဆောင်းကာ
ပြန်ပြန်တိုက်တယ်။
တိုက်တိုင်းရှုံး၍ စိတ်ပျက်အားလျော့နေခိုက်
သူခိုအောင်းရာ ကျောက်ဂူခေါင်းမိုးတွင်
ဒီဘက်ကျောက်စွမ်းမှ ဟိုဘက်ကျောက်စွန်းသို့
ပိုးမျှင်တန်းလန်းဖြင့် ခုန်ကူးနေတဲ့ ပင့်ကူမှာ
မမီမကမ်းနဲ့အကြိမ်ကြိမ် ပြုတ်ကျနေပါတယ်။
အကြိမ်ကြိမ် ကြိုးစားတဲ့တိုင်အောင် မအောင်မြင်တာ
တွေ့ရတော့ “ တော်တော်မိုက်တဲ့ ပင့်ကူလေးပဲ၊
ဒီလောက်အဝေးကြီး၊
သူမို့လို့ မစဉ်းမစား ခုန်ကူးနေတယ် ”လို့
ဘုရင်ကြီးကတွေးမိရင်း
“ အင်း…ငါ့လိုပါပဲလား ”
လို့ခံစားနေရတယ်။
ဇွဲမလျှော့တဲ့ ပင့်ကူငယ်ကို စောင့်ကြည့်နေရာ နောက်ဆုံးတစ်ကြိမ်မှာတော့
ပင့်ကူငယ်လေးဟာ တစ်ဖက်ကျောက်စွန်းသို့ ချောချောမောမော ခြေချနိုင်ခဲ့ပါတယ်။
အဲဒီနောက်မှာတော့ ပိုးချည်မျှင် စတင်သွယ်တန်းလိုက်နိုင်တာကို အံ့သြစွာ
တွေ့လိုက်ရပါတယ်။
ဇွဲနဲ့ မဆုတ်မနစ်ကြိုးစားရင် နောက်ဆုံးတော့ အောင်မြင်တာပဲ
လို့ ဘုရင်ကြီး သဘောပေါက်နားလည်သွားပါတယ်။
အဲဒီအချက်ပေါ်မှာ အားကျအတုယူပြီး
ပြန်တိုက်တဲ့အခါ အောင်မြင်ပြီး
ထီးနန်းကို ပြန်လည်သိမ်းပိုက်နိုင်ခဲ့ပါတယ်။
တကယ်တော့ ဘဝမှာ အောင်မြင်ဖို့ဆိုတာ
တစ်ခုခုကို သဘောပေါက်၊နားလည်ပြီး
ရုန်းကန်ကြိုးစားမိဖို့သာ အရေးကြီးပါတယ်။
ဘဝမှာ အလင်းတစ်ချက် လက်သွားဖို့
နဲ့
အဲဒီအလင်းရောင်ကို အမိအရ ဆုပ်ကိုင်နိုင်ဖို့ကို
လူတိုင်းနားလည်သဘောပေါက်ခဲ့မယ်ဆိုရင်
အောင်မြင်ခြင်းဆိုတာ
လက်တစ်ကမ်းမှာပါလားလို့
လူတိုင်းသဘောပေါက်၊နားလည်ပြီး၊
လူတိုင်းတွေ့ထိခံစားရမှာပါ။
အခက်အခဲတွေ ကတော့ ရှိနေပါလိမ့်မယ်။
အဲဒီအခက်အခဲကိုလည်း ဖြေရှင်းနိုင်တဲ့နည်းလမ်းကောင်းတွေလည်း
ရှိနေစမြဲပါပဲ။
No comments:
Post a Comment