01.03.2012 နေ့ဖတ်ရန်သတင်းများ

by Myanmar Journal on Thursday, March 1, 2012 at 11:37am ·

မြောက်ကိုရီးယား ခြေလှမ်းသစ် ကန်ကြို


မြောက်ကိုရီးယားရဲ့ ယူရေနီယမ် သန့်စင်ရေး အစီအစဉ်နဲ့ အဏုမြူနဲ့ တာဝေးပစ် ဒုံးကျည် စမ်းသပ်မှုတွေ ရပ်ဆိုင်းထားဖို့ ကြေညာချက်ကို အမေရိကန် အစိုးရ က ကြိုဆိုခဲ့ပါတယ်။
ဒါဟာ ကိုရီးယား ကျွန်းဆွယ်မှာ အဏုမြူ လုံးဝ ကင်းစင်ရေး အတွက် အကောင်းဘက် ဦးတည် တဲ့ ပထမ ခြေလှမ်း၊ ဒါပေမယ့် လက်တွေ့ လုပ်ဆောင်ဖို့ စွဲမြဲဖို့ လိုတယ်လို့ အမေရိကန် အစိုးရက ဆိုပါတယ်။
အရင်ပတ်က ဘေဂျင်းမှာ အမေရိကန်နဲ့ မြောက်ကိုရီးယား သံတမန်တွေ တွေ့ဆုံပြီးနောက် ဒီကြေညာချက် ထွက်လာတာပါ။
အပြန်အလှန် အနေနဲ့ အမေရိကန်က မြောက်ကိုရီးယားကို စားနပ်ရိက္ခာ အများအပြား ကူညီ ပေးဖို့ အစီအစဉ်ကို လက်စသတ် နေပါတယ်။





ဆီးရီးယား သူပုန် တပ်ဖွဲ့ တပ်သားဆီးရီးယား တိုက်ပွဲ ပြင်းထန်
ဆီးရီးယား အစိုးရတပ်တွေဟာ ဟုမ်းစ်မြို့က ဘာဘာအမာ ရပ်ကွက်ကို အပြင်းအထန် ဗုံးကြဲပြီး ချီတက် နေတယ်လို့ သတင်းရရှိ ပါတယ်။
နာရီပိုင်း အတွင်း အတိုက်အခံ တပ်သားတွေကို ချေမှုန်း ပစ်နိုင်မယ်လို့ အစိုးရ အရာရှိ တွေက ဆိုပါတယ်။
အတိုက်အခံ တွေကတော့ ဆီးရီးယား လွတ်မြောက်ရေး တပ်သားတွေက အစိုးရ ထိုးစစ်ကို တွန်းလှန် နိုင်ခဲ့တယ် လို့ ဆိုပါတယ်။
ဟုမ်းစ် မြို့ ဒေသခံ တွေက ကယ်ဆယ်ရေး အင်တာနက် စာမျက်နှာ တွေကို အကြိမ်ကြိမ် ဆက်သွယ်ပြီး အကူအညီပေးဖို့ တောင်းခံနေကြပါတယ်။
ကုလ သမဂ္ဂ လူမှု ကူညီရေး အကြီးအကဲ ဗယ်လာရီ အေမို့စ်ကို ပြည်ဝင်ခွင့် ပေးဖို့ ငြင်းပယ် လိုက်ပြီးနောက် ဆီးရီးယား တပ်တွေ ထိုးစစ် ဆင်လာတာ ဖြစ်ပါတယ်။




Apple ဒေါ်လာ ဘီလျံ ၅ ရာတန်Apple တန်ဖိုး အကြီးဆုံး ကုမ္ပဏီဖြစ်
အိုင်ဖုန်းနဲ့ အိုင်ပေါ့ တွေ ထုတ်လုပ် ရောင်းချတဲ့ Apple ကုမ္ပဏီရဲ့ ပိုင်ဆိုင်မှုဟာ ဒေါ်လာ ဘီလျံ ငါးရာ တန်ဖိုး ရှိနေပြီလို့ ခန့်မှန်း ကြပါတယ်။
ဗုဒ္ဓဟူးနေ့ အစောပိုင်းက နယူးယော့ စတော့ အိပ်ချိန်းမှာ ဒီပမာဏထိ ရောက်သွား ခဲ့ပါတယ်။
အက်ဇွန် ရေနံ ကုမ္ပဏီကို ကျော်တက်ပြီး ကမ္ဘာ့ တန်ဖိုး အကြီးဆုံး ကုမ္ပဏီ နေရာ ရခဲ့ပြီ ဖြစ်ပါတယ်။
ဒေါ်လာ ဘီလျံ ၅ ရာ ထိ တန်ဖိုးတက်ခဲ့တဲ့ ထဲမှာတော့ သူ့ အရင်က ၅ ယောက် ရှိခဲ့ပြီး ဖြစ်ပါတယ်။
သူနဲ့ ပြိုင်ဘက် မိုက်ခရိုဆော့ဖ် ကုမ္ပဏီ အပါအဝင် ဒီ ကုမ္ပဏီတွေဟာ အဲဒိ ပမာဏထိ ရောက်ပြီးမှ ပြန်ကျ ကုန်တာပါ။




ဆီးရီးယားအစိုးရတပ်တွေ ဟုမ်းစ်မြို့ကို ဝင်ရောက်ပြီ
ဟုမ်းစ်မြို့ကို အမြောက်နဲ့ ပစ်ခတ်နေတာ သီတင်း လေးပတ် နီးပါး ရှိနေပြီ ဖြစ်ပါတယ်
ဆီးရီးယားနိုင်ငံ တတိယ အကြီးဆုံး မြို့ ဖြစ်တဲ့ ဟုမ်းစ်မြို့ကို အစိုးရတပ်ဖွဲ့တွေ ဟာ မြေပြင်ကနေ ထိုးစစ်ဆင်ပြီး စတင် ဝင်ရောက် နေပြီဖြစ်တယ်လို့ သတင်းတွေ ရရှိပါတယ်။
မြို့တော် ဒမားစကပ်စ်က အမည် မဖေါ်လိုတဲ့ အစိုးရ အရာရှိတဦးက မြေပြင်ထိုးစစ်တွေ စတင် နေပြီ ဖြစ်ကြောင်း အတည်ပြု ပြောကြားပါတယ်။
နောက်ပြီး အစိုးရတပ်ဖွဲ့တွေဟာ သူတို့ ဝိုင်းထားတဲ့ ရာပေါင်းများစွာသော သူပုန် တိုက်ခိုက်ရေးသမားတွေ ရှိနေတဲ့ ဘာဘာ အာမာရပ်ကွက်ကို ရှင်းလင်းမှာ ဖြစ်တယ်လို့ လည်း အဲဒီအရာရှိက ပြောပါတယ်။
အဲဒီ ဘာဘာ အာမာ ရပ်ကွက်ကို အမြောက်တွေနဲ့ ပစ်ခတ် တိုက်ခိုက်နေတာဟာ သီတင်း ၄ ပတ် နီးပါး ရှိလာနေပြီ ဖြစ်ပါတယ်။
ဟုမ်းစ်မြို့နဲ့ အဆက်အသွယ်တွေဟာလည်း အကုန်လုံးနီးပါး ပြတ်တောက် သွားပုံ ရှိနေပါ တယ်။
အစိုးရတပ်တွေဟာ မြို့ကို အမြောက်တွေ၊ မော်တာတွေ၊ တင့်ကားတွေနဲ့ ပိုမိုပစ်ခတ်မှုတွေ လုပ်နေ တယ်လို့လည်း အတိုက်အခံ တက်ကြွ လှုပ်ရှားသူတွေက ပြောပါတယ်။






မကြာခင် ပြောင်းရွှေ့ကြတော့မယ့် Broadcasting House အဆောက်အဦသစ်ဘီဘီစီ ကမ္ဘာတလွှား အသံလွှင့် ဌာနကြီးရဲ့ အနာဂတ် အစီအစဉ်
BBC World Service ကမ္ဘာတလွှား အစီအစဉ် ဟာ အသက် ၈၀ ပြည့်သွားပါပြီ။
၁၉၃၂ က စတင်ခဲ့တဲ့ BBC ကမ္ဘာတလွှား အစီအစဉ် ရဲ့ မွေးနေ့ပွဲ ကို ရုံးချုပ်ဖြစ်တဲ့ Bush House ရဲ့ အလယ် ဗဟို ရင်ပြင် ကွင်းလယ် ထဲက အဖြူရောင် ရွက်ဖျင်တဲကြီး ထဲကနေ မြန်မာ ဌာန အပါအဝင် ဘီဘီစီ အသံလွှင့် ဌာန ၁၇ ခု က တိုက်ရိုက် အသံလွှင့် ခဲ့ကြ ပါတယ်။
BBC ကမ္ဘာတလွှားအစီအစဉ် ရဲ့ ပထမဦးဆုံး အသံလွှင့် အစီအစဉ်က Bush House ကနေ အစပြု ခဲ့တာမဟုတ်ပေမယ့် Bush House ဟာ နောက်ပိုင်းမှာ BBC ကမ္ဘာတလွှားအစီအစဉ် ရဲ့ ရုံးချုပ် ဖြစ်ပါတယ်။
အဲဒါကြောင့် Bush House လို့ပြောရင် BBC ကမ္ဘာတလွှား အစီအစဉ် ပဲ လို့ လူတွေက သိကြ ပါတယ်။
မကြာမှီက လုပ်ခဲ့တဲ့ စစ်တမ်းအရ ဗြိတိန်နိုင်ငံသား ၇၅% က BBC World Service ကမ္ဘာတလွှားအစီအစဉ် ကို ဗြိတိန်နိုင်ငံ ကို ကိုယ်စားပြုတဲ့ သံအမတ်ကြီးတဦး သဖွယ် ဂုဏ်ယူစွာ နဲ့ လက်ခံ ပြောဆို နေကြ ပါတယ်။
သူတို့ လက်ခံသလိုပဲ BBC ကမ္ဘာတလွှားအစီအစဉ် ကလဲ ဘာသာစကား မျိုးစုံ နဲ့ ထုတ်လွှင့် ခဲ့သလို အမြဲတမ်း ထိန်းထားတဲ့ ဂုဏ်ပုဒ် တခုကတော့ ဘက်လိုက်မှု မရှိပဲ တိတိ ကျကျ သတင်း ထုတ်လွှင့်နိုင်မှု ပဲ ဖြစ်ပါတယ်။
ဒါပေမယ့် Multi-media သတင်းခေတ်မှာ BBC World Service ကမ္ဘာတလွှား အစီအစဉ် အရင် က လို သူ့ရဲ့ ထူးခြားတဲ့ ဂုဏ်သတင်း ကို ဆက်ထိန်း နိုင်ပါ့ မလား ဆိုတဲ့ စိုးရိမ် စိတ် တွေ ရှိနေ ပါတယ် ။
BBC World Service ကမ္ဘာတလွှား အစီအစဉ် ရဲ့ ဒါရိုက်တာ Peter Horrocks က စိန်ခေါ်မှုတွေ ရှိတဲ့ အကြောင်း ပြောရာမှာ
ကျနော်တို့ စိန်ခေါ်မှုတွေ ကို ရင်ဆိုင်နေရတာ မှန်ပါတယ်၊ ကမ္ဘာ ကြီးကလဲ အလျင်အမြန် ပြောင်းလဲနေပါတယ်၊ သတင်းတွေကို လည်း တကမ္ဘာလုံးက အာရုံပိုစိုက်လာ နေပါတယ်၊ အဲဒါကြောင့် ကမ္ဘာ တလွှား အစီအစဉ် က ပိုပြီးတောင် အရေးပါလာပါတယ်၊ နောက်ပြီး တခြား အသံလွှင့် ဌာန တွေ ရဲ့ ပြိုင်ဆိုင်မှု တွေကို ရင်ဆိုင် နေရ ပါတယ် လို့ ပြောပါတယ်။
ရှေ့လာမယ့် မတ် လ က စလို့ BBC World Service ကမ္ဘာတလွှားအစီအစဉ် ဟာ Global News ဆိုတဲ့ အမည် နဲ့ ခေတ်မီ တိုးချဲ့ အဆောက်အဦးသစ်ကြီး ဆီ ပြောင်းကြ မှာပါ။
အခုလို Multi-media အဆောက်အအုံကို ပြောင်းတဲ့ အတွက် BBC ရဲ့ အခြား သတင်းဌာန တွေ နဲ့ တမိုးအောက်ထဲမှာ နီးနီးကပ်ကပ် အတူတွဲပြီး အလုပ်လုပ် နိုင်တော့မှာ ဖြစ်တယ် လို့လည်း BBC ကမ္ဘာတလွှား အသံလွှင့် ဌာန ဒါရိုက်တာ Peter Horrocks က ပြောဆို သွားပါတယ်။




အဲလ်ခိုင်းဒါး ခေါင်းဆောင်တဦးကို ဖမ်းဆီးမိကြောင်း အီဂျစ်ကြေညာ
ဆာအိ အဲလ်အဒဲလ် ဟာ စက်တင်ဘာ ၁၁ ဗုံးခွဲ မှုမှာ ပါဝင်ပတ်သက်သူလို့ စွပ်စွဲထားပါတယ်
အီဂျစ်နိုင်ငံ ကိုင်ရိုမြို့လေဆိပ်မှာ အဲလ်ခိုင်းဒါး ထိပ်တန်းခေါင်းဆောင် တဦးကို ဖမ်းဆီးလိုက်တယ်လို့ အီဂျစ် အာဏာပိုင်တွေက ပြောကြားလိုက်တာနဲ့ ပတ်သက်ပြီး အဲဒီသူဟာ အဲလ်ခိုင်းဒါး ခေါင်းဆောင် ဟုတ်မဟုတ် ဆိုတာနဲ့ ပတ်သက်ပြီး သံသယ ဖြစ်မှုတွေ ထွက်ပေါ်လာနေပါတယ်။
နယူးယောက်မြို့ စက်တင်ဘာ ၁၁ ဗုံးခွဲ တိုက်ခိုက်မှုနဲ့ အာဖရိက အရှေ့ပိုင်းက တိုက်ခိုက်မှု တွေမှာ ပါဝင်သူ ဖြစ်ပြီး၊ အမေရိကန် FBI က အလိုရှိနေတဲ့ အဲလ်ခိုင်းဒါး ထိပ်တန်း ခေါင်းဆောင်တဦး ဖြစ်တဲ့ ဆာအိ အဲလ် အဒဲလ်ကို ဖမ်းဆီးမိလိုက်တာ ဖြစ်တယ် လို့ အီဂျစ် အာဏာပိုင်တွေက ကြေညာထားတာ ဖြစ်ပါတယ်။
ဒါပေမယ့် အဲဒီသူကတော့ သူဟာ ဆာအီ အဲလ် အဒဲလ် မဟုတ်ကြောင်း ငြင်းဆိုနေပြီး၊ အကြမ်းဖက်မှု တိုက်ဖျက်ရေး ကျွမ်းကျင်သူ တချို့ကလည်း ဒီကိစ္စအပေါ် သံသယ ရှိနေကြပါတယ်။
အဲဒီသူဟာ ဆာအိ အဲလ် အဒဲလ် မဟုတ်ဘူးဆိုရင်တော့ ဒါဟာ အီဂျစ် အာဏာပိုင်တွေကို အရှက်ရ စေလိမ့်မယ်လို့ ဘီဘီစီ သတင်းထောက်က ပြောပါတယ်။
မစ္စတာ အဲလ်အဒဲလ်ဟာ အီဂျစ် စစ်သားဟောင်းတဦး ဖြစ်ပြီး နောက်ပိုင်းမှာ သူဟာ အစိုးရကို ဆန့်ကျင် တိုက်ခိုက်နေတဲ့ အစ္စလာမ် စစ်သွေးကြွတွေနဲ့ ပူပေါင်း လိုက်တာ ဖြစ်ပါတယ်။
သူဟာ အိုစမာ ဘင်လာဒင်ရဲ့ အတွင်းစည်းမှာ ရှိတဲ့ အဓိက အဖွဲ့ဝင်တဦး ဖြစ်တယ်လို့ ယူဆရပြီး၊ ပြီးခဲ့တဲ့ နှစ်အနည်းငယ်အတွင်း သူဟာ ပါကစ္စတန်နိုင်ငံထဲမှာ ထွက်ပြေး ပုန်းရှောင်နေတာ ဖြစ်တယ်လို့ တွက်ဆရပါတယ်။




မြန်မာအတွက် အိုဒီအေ အပြည့်ပြန်ပေးဖို့ ဂျပန်စဉ်းစားနေ
၁၉၈၈ နောက်ပိုင်း မြန်မာနိုင်ငံက စီမံကိန်းကြီး တွေ အတွက် ဂျပန်က အကူအညီ ရပ်စဲခဲ့
ဂျပန်နိုင်ငံကနေ မြန်မာနိုင်ငံအတွက် ODA လို့ခေါ်တဲ့ နိုင်ငံရပ်ခြား ဖွံ့ဖြိုးရေး အကူ အညီတွေ အပြည့်အဝ ပြန်ပေးဖို့ စဉ်းစား စီစဉ်နေတယ်လို့ ဂျပန်နိုင်ငံခြားရေး ဝန်ကြီး ဌာနက ပြောခွင့် ရသူ မစ္စတာ မာဆာရူ ဆာတိုက ပြောပါတယ်။
မြန်မာအတွက် ODA အစီအစဉ်တွေကို ပြန်ပေးရေး စဉ်းစားဖို့အတွက် ဂျပန် နိုင်ငံခြားရေး ဝန်ကြီးကနေ သူ့အောက်က အရာရှိတွေကို ညွှန်ကြား ထားကြောင်း မစ္စတာ ဆာတိုက ပြောကြားတာ ဖြစ်ပါတယ်။
ဒါပေမယ့် ODA တွေ ပြန်ပေးဖို့ မဆုံးဖြတ်ခင်မှာ မြန်မာနိုင်ငံ အနေနဲ့ အရင်တုန်းက တင်ရှိနေတဲ့ ကြွေးမီတွေ ပြန်ပေးရေး အတွက် ဆွေးနွေးမှာ ဖြစ်တဲ့အကြောင်း မစ္စတာ ဆာတိုက ပြောပါတယ်။
မြန်မာကနေ ဂျပန်ကို ပြန်ဆပ်ဖို့ ကျန်ရှိနေတဲ့ အကြွေးတွေဟာ ဂျပန်ယန်းငွေ ဘီလီယံ ၄၁၀ လောက်ရှိပြီး၊ ဂျပန် နိုင်ငံတကာ ကော်ပိုရေးရှင်း အေဂျင်စီက ချေးထားတဲ့ ငွေကြေး ကတော့ ယန်းငွေ သန်း ၂၇၀ ကျော်ရှိကြောင်း မစ္စတာ ဆာတိုက ပြောပါတယ်။
အခုလို ODA တွေ ပြန်ပေးတဲ့နေရာမှာ မြန်မာ့ ဒီမိုကရေစီရေး ပြုပြင်ပြောင်းလဲမှုတွေကို စောင့်ကြည့်နေမှာ ဖြစ်တယ်လို့လည်း သူက ဆိုပါတယ်။
အငြိမ်းစား စီးပွားရေး တက္ကသိုလ် ပါမောက္ခချုပ် ဦးမော်သန်းကတော့၊ ODA တွေ အပြည့်အဝ ပြန်ရမယ်ဆိုရင် တိုင်းပြည်အတွက် မုချ အကျိုးရှိမှာ ဖြစ်ကြောင်း ပြောပါတယ်။
တိုင်းပြည်မှာ သယံဇာတတွေလည်းရှိပြီး လုပ်နိုင်ကိုင်နိုင်တဲ့ အနေအထားတွေလည်း ရှိတဲ့ အတွက်၊ ထိုက်တန်တဲ့ ရင်းနှီးမှုမျိုးနဲ့ သုံးစွဲမှုတွေကို လုပ်မယ်ဆိုရင် အကျိုးရှိမှာ ဖြစ်ကြောင်း ဦးမော်သန်းက ဘီဘီစီကို ပြောပါတယ်။




ဘီဘီစီ ကမ္ဘာ တလွှား အစီအစဉ် နှစ် ၈၀ မြောက် မွေးနေ့
ဘီဘီစီ ဝန်းထဲမှာ ဆောက် ထားတဲ့ ရွက်ဖျင် တဲကြီး ကနေ ဘာသာပေါင်း ၁၇ ခုနဲ့ ထုတ် လွှင့်
ဘီဘီစီ ကမ္ဘာတလွှား အစီအစဉ်ရဲ့ နှစ် ရှစ်ဆယ်ပြည့် မွေးနေ့ အထူး အစီအစဉ် တွေကို ဗုဒ္ဓဟူးနေ့က တစ်နေကုန် ထုတ်လွှင့် ပေးရာမှာ ကမ္ဘာတလွှား အစီအစဉ် တည်ရှိတဲ့ လန်ဒန် မြို့က Bush House ဘွတ်ရ်ှဟောက်စ် အဆောက် အဦရဲ့ အလယ်က ကွက်လပ် ထဲမှာ အဖြူရောင် ရွက်ဖျင် တဲကြီး တစ်ခု ထိုးပြီး အစီအစဉ် တွေကို တိုက်ရိုက် ထုတ်လွှင့် ပေးခဲ့ ပါတယ်။
ဘီဘီစီ မြန်မာ ဘာသာ အပါအဝင် ဘာသာ ပေါင်း ၁၇ မျိုးနဲ့ ထုတ်လွှင့်တဲ့ အပြင် အင်္ဂလိပ်လို ထုတ်လွှင့် နေတဲ့ အစီအစဉ် တွေ ကိုရော ရုပ်မြင် သံကြား ထုတ်လွှင့်မှု တွေကိုပါ အဲဒီ ရွက်ဖျင်တဲကြီး ကနေ ထုတ်လွှင့် ပေးခဲ့ တာ ဖြစ်ပါတယ်။
ဘီဘီစီရဲ့ ထုတ်လွှင့်ချက် တွေကို ဘယ်လို စီစဉ် ဆောင်ရွက် ကြတယ် ဆိုတာ ကမ္ဘာ တလွှားက သောတရှင်တွေ သိရအောင် အင်တာနက် ကနေ တနေကုန် တိုက်ရိုက် ထုတ်လွှင့် ပေးခဲ့ သလို ဘွတ်ရ်ှဟောက်စ် အဆောက် အဦကို ကိုယ်တိုင် လာရောက်ပြီး တိုက်ရိုက် ထုတ်လွှင့် ချက်တွေမှာ ပါဝင် ဆွေးနွေး သူတွေလည်း သိမြင်ခွင့် ရကြ ပါတယ်။
မြန်မာ ပိုင်း အစီ အစဉ်ကလည်း တိုက်ရိုက် ထုတ်လွှင့်
 လူငယ် သောတရှင်တွေ လာရောက် ဆွေးနွေး ခဲ့တာ တွေကို တိုက်ရိုက် ထုတ်လွှင့်ခဲ့
ဘီဘီစီ ကမ္ဘာ တလွှား အစီအစဉ်ရဲ့ နှစ်ပေါင်း ၈၀ ပြည့် အထိမ်း အမှတ် နေ့မှာ ဘီဘီစီ မြန်မာ သောတရှင် လူငယ် တချို့ကို ဖိတ်ခေါ်ပြီး ရွက်ဖျင်တဲကြီး ထဲမှာ စကားဝိုင်းဖွဲ့ ဆွေးနွေး တာကို လေလှိုင်းကနေ တိုက်ရိုက် ထုတ်လွှင့်ခဲ့ ပါတယ်။
နှစ်ပေါင်း ၈၀ သက်တမ်း ရှိလာပြီ ဖြစ်တဲ့ ဘီဘီစီ ကမ္ဘာ တလွှား အစီအစဉ်ကြီးက ရှေ့ကို ဘယ်လို ခရီးဆက်ကြမလဲ၊ ပြောင်းလဲ တိုးတက် လာနေတဲ့ မီဒီယာ နည်းပညာ ခေတ်ကြီးနဲ့ အညီ ဘီဘီစီရဲ့ သောတရှင် တွေက ဘာတွေကို လိုလား သိချင်ကြ မလဲ၊ ဘီဘီစီ ကရော သေတရှင် တို့ရဲ့ လိုလားချက်တွေကို ဘယ်လောက် ဘယ်လို ကြိုးပမ်း ဖြည့်ဆည်း နိုင်မလဲ ဆိုတာ ဆွေးနွေး ကြသူ တွေက အမြင် အသီးသီးကို ဝိုင်းဖွဲ့ ဆွေးနွေး သွားခဲ့ကြ ပါတယ်။
ဘီဘီစီ ကမ္ဘာ တလွှား အစီအစဉ်က အခု လက်ရှိ အသံလွှင့် နေတဲ့ Bush House ဘွတ်ရ်ှဟောက်စ် ကနေ မြန်မာ ဌာန အပါအဝင် ဘာသာ စကား ဌာန တွေ အားလုံး မကြာခင် ရက်ပိုင်း အတွင်းမှာ ခေတ်မီ နည်းပညာ တွေနဲ့ တည်ဆောက် ထားတဲ့ Broadcasting House အသံလွှင့်ရုံသစ်ကြီးကို ပြောင်းရွှေ့ တော့မှာ ဖြစ် ပါ တယ်။




နောက်ပြန် လှည့်နိုင်သေးလို့ ဒေါ်စုဆို
တချို့က သိပ် အကောင်းမြင်လွန်း နေတယ်
နှစ် ၅ဝ ကြာ စစ်အုပ်ချုပ်ရေးက ဦးဆောင်တဲ့ ဒီမိုကရေစီ ပြောင်းလဲရေး တွေဟာ နောက်ပြန် မသွားတော့ဘူးလို့ ပြောဖို့ စောလွန်းကြောင်း မြန်မာ အတိုက်အခံ ခေါင်းဆောင် ဒေါ်အောင်ဆန်း စုကြည်က ဗုဒ္ဓဟူးနေ့က ပြောကြား ခဲ့ပါတယ်။
တချို့က သိပ် အကောင်းမြင်လွန်း နေတယ် ၊ သူ့အနေနဲ့တော့ အခြေအနေကို သတိထားပြီး အကောင်းမြင်တယ်လို့ ကနေဒါ နိုင်ငံ အော့တာဝါ တက္ကသိုလ် ကျောင်းသားတွေကို ဗီဒီယိုနဲ့ စကားပြော ရာမှာ ဒေါ် အောင်ဆန်း စုကြည်က ပြောဆို ခဲ့တာပါ။
အကြွင်းမဲ့ အာဏာဟာ စစ်တပ်လက် မှာပဲ ရှိနေသေး တာမို့ ဒီမိုကရေစီ ကူးပြောင်းရေးကို စစ်တပ်က လုံးဝ ထောက်ခံ မလာမချင်း နောက်ပြန် လှည့်မယ့် အန္တရာယ် မရှိဘူးလို့ ပြောလို့ မရသေးကြောင်း ဒေါ် အောင်ဆန်း စုကြည်က ဆိုပါတယ်။
မြန်မာပြည် အခြေအနေဟာ ပြုပြင် ပြောင်းလဲရေး လမ်းစပေါ် ရောက်နေပြီလို့ ဒေါ် အောင်ဆန်း စုကြည် ပြောဆိုခဲ့ပြီး ဧပြီ ကြားရွေးကောက်ပွဲကို ဝင်ဖို့ ဆုံးဖြတ် ခဲ့ပါတယ်။
နေပြည်တော်မှာ ဒေါ် အောင်ဆန်း စုကြည် စည်းရုံးဟောပြောဖို့ စီစဉ်ထားတဲ့ လယ်ကွင်းကို အသုံးမပြုဖို့ ဒေသ အာဏာပိုင်တွေက တားမြစ်မှုတွေ ရှိနေတယ်လို့ သတင်း ရရှိပါတယ်။

ဆီးရီးယား လုံခြုံရေးတပ်နှိပ်ကွပ်မှုကြောင့် လူ ၇,၅၀၀ ကျော်သေဆုံး
By ဗွီအိုအေ (မြန်မာဌာန) 
ဆီးရီးယားနိုင်ငံက အစိုးရဆန့်ကျင်ရေး လှုပ်ရှားသူတွေရဲ့ အမာခံနယ်မြေ ဟုမ်းစ် (Homs) မြို့ကို အစိုးရ လုံခြုံရေး တပ်ဖွဲ့တွေက မြေပြင် ထိုးစစ်တွေ စတင် ပြုလုပ်နေပါပြီ။ အစိုးရက ဗုံးကျဲ တိုက်ခိုက်မှုတွေ သီးတင်း ၃ ပတ်ကျော်ကြာ ဆက်တိုက် ပြုလုပ်နေတဲ့အတွက် ရာပေါင်းများစွာ သေဆုံးခဲ့ပြီး အသက်ရှင် ကျန်နေသူတွေဟာလည်း စားနပ်ရိက္ခာ၊ ရေနဲ့ ဆေးဝါးတွေ ပြတ်တောက်တဲ့ဒဏ်ကို ခံနေရတယ်လို့ မျက်မြင် သက်သေတွေက ပြောပါတယ်။ 

ဗုဒ္ဓဟူးနေ့ကဖြစ်ပွားတဲ့ တိုက်ပွဲတွေကတော့ ဟုမ်းစ် မြို့က Baba Amr ဒေသမှာ ဖြစ်ပွားခဲ့တာလို့ ဆိုပါတယ်။ အဲဒီ Baba Amr ဒေသကို အပြီးသတ် ထိုးစစ်ဆင်နိုင်ဖို့ ရည်ရွယ်တဲ့အနေနဲ့ ဆီးရီးယားအစိုးရက ခြေလျင်တပ်တွေနဲ့ တင့်ကားတွေ အင်္ဂါနေ့မှာ ပို့လိုက်တာဖြစ်တယ်လို့ လူ့အခွင့်အရေး လှုပ်ရှားသူတွေက ပြောပါတယ်။ 

ဒီအတောအတွင်း ဆီးရီးယားနိုင်ငံမှာ ဖြစ်နေတဲ့ အစိုးရဆန့်ကျင်ရေး ဆန္ဒပြ လှုပ်ရှားမှုတွေအပေါ် သမ္မတ Bashar al – Assad အစိုးရက အကြမ်းဖက် နှိမ်နင်းခဲ့တဲ့အတွက် ၇,၅၀၀ ကျော် သေဆုံးခဲ့ပြီးဖြစ်တယ်လို့ အဆင့်မြင့် ကုလသမဂ္ဂအရာရှိက ပြောလိုက်ပါတယ်။ ဆီးရီးယား နိုင်ငံအတွင်း ဖြစ်ပေါ်နေတဲ့ ပဋိပက္ခ ပြေလည်ရေးနဲ့ လူသားချင်းစာနာမှု ဆိုင်ရာ အကူအညီတွေ ထောက်ပံ့နိုင်ရေးတို့အတွက် နိုင်ငံတကာက သံတမန်ရေးနည်းလမ်း ကြိုးပမ်းနေကြတဲ့အချိန် အခုလို ပြောဆိုလိုက်တာ ဖြစ်ပါတယ်။ 

အစိုးရရဲ့ အကြမ်းဖက် နှိပ်ကွပ်မှုတွေကြောင့် အမျိုးသမီးတွေနဲ့ ကလေးငယ်တွေအပါအ၀င် ဆီးရီးယား နိုင်ငံထဲမှာ တစ်နေ့ကို လူ ၁၀၀ လောက် သေဆုံးနေတယ်ဆိုတဲ့ ခိုင်လုံတဲ့ သတင်းအချက်အလက်တွေ ရရှိထားတဲ့အကြောင်း ကုလသမဂ္ဂ နိုင်ငံရေးဆိုင်ရာ အကြီးအကဲ Lynn Pascoe က အင်္ဂါနေ့မှာ ပြောလိုက်တာပါ။ အစိုးရရဲ့ တိုက်ခိုက်မှုကို သီတင်းပတ် အတော်ကြာကြာ ခံနေရတဲ့ ဒေသတွေကို လူသားချင်းစာနာမှုဆိုင်ရာ အကူအညီတွေ ထောက်ပံ့နိုင်ရေးအတွက် တိုင်းပြည်အတွင်း ချက်ချင်း အပစ်အခတ်ရပ်စဲဖို့ တောင်းဆိုထားတဲ့ ကုလသမဂ္ဂ လုံခြုံရေးကောင်စီရဲ့ အဆိုပြုချက် မူကြမ်းတစ်ခုကို သံတမန်တွေက ရေးဆွဲနေတဲ့အကြောင်း ပြင်သစ်နိုင်ငံက အင်္ဂါနေ့မှာ ပြောပါတယ်။

Arizona နဲ့ Michigan မှာ Romney အနိုင်ရ
By ဗွီအိုအေ (မြန်မာဌာန)
အင်္ဂါနေ့က ပြုလုပ်ခဲ့တဲ့ အမေရိကန် ရီပက်ဘလီကန် ပါတီရဲ့ သမ္မတလောင်း ရွေးချယ်ရေး ပြည်နယ်အခြခံ ပဏာမ ရွေးကောက်ပွဲတွေမှာ မက်ဆာချူးဆက် (Massachusetts) ပြည်နယ် အုပ်ချုပ်ရေးမှူးဟောင်း မစ်ရွမ်မနီ (Mitt Romney) က မစ်ရှီကန် (Michigan) ပြည်နယ်နဲ့ အရီဇိုးနား (Arizona) ပြည်နယ်တွေမှာ အဓိကပြိုင်ဘက် ပင်ဆဲဗေးနီးယား (Pennsylvania) ပြည်နယ် ကိုယ်စားပြု အထက်လွှတ်တော် အမတ်ဟောင်း ရစ်က် ဆန်တိုရမ် (Rick Santorum) ကို အနိုင်ရရှိသွားခဲ့ပါတယ်။
မစ်ရှီကန် ပြည်နယ်ဟာ ရွမ်မနီ ရဲ့ မွေးဇာတိဖြစ်သလို သူ့ရဲ့ ဖခင်က အုပ်ချုပ်ရေးမှူး တာဝန် ထမ်းဆောင်ခဲ့တဲ့ ပြည်နယ်လည်း ဖြစ်ပါတယ်။ အခုလို ပြည်နယ်ကြီး နှစ်ခုမှာ သူအနိုင်ရခဲ့တာဟာ မဟာအောင်ပွဲပါပဲလို့ မစ္စတာ ရွမ်မနီ က ပြောဆိုလိုက်ပြီး မီရှီကန် နဲ့ အရီဇိုးနား ပြည်နယ်တွေက သူ့ကို ထောက်ခံ ကြသူတွေကိုလည်း ကျေးဇူးတင်စကား ဆိုခဲ့ပါတယ်။
ဒါ့အပြင် ဒီမိုကရက်ပါတီရဲ့ သမ္မတလောင်းဖြစ်သူ လက်ရှိသမ္မတ အိုဘားမားကို ဝေဖန် ထိုးနှက် ပြောဆိုခဲ့တာမှာ အိုဘားမားရဲ့အစိုးရဟာ အစိုးရ အရွယ်အစားကို ကြီးမားအောင် လုပ်ဆောင်နေတာကြောင့် အစိုးရဟာ အသုံးစားရိတ်တွေ များပြားနေရသလို ရေနံနဲ့ ပတ်သက်ရင်လည်း ပြည်ပကို မှီခိုလွန်းနေတယ်လို့ ထည့်သွင်း ပြောဆိုသွားပါတယ်။



အမေရိကန် NGO တွေ ခရီးသွားခွင့်ပိတ်ပင်မှု အီဂျစ်ရုပ်သိမ်း
By ဗွီအိုအေ (မြန်မာဌာန) 
အမေရိကန်နိုင်ငံသား ဒီမိုကရေစီရေး တက်ကြွလှုပ်ရှားသူတွေကို ခရီးသွားလာခွင့် တားဆီးပိတ်ဆို့ထားတာကို အီဂျစ်အာဏာပိုင်တွေက ပြန်ပြီးတော့ ရုပ်သိမ်းလိုက်ပါတယ်။ တရားမဝင် နိုင်ငံရေးလှုပ်ရှားမှုတွေကြောင့် ဆိုပြီးတော့ အီဂျစ်နိုင်ငံက ချမှတ်လိုက်တဲ့ ခရီးသွားခွင့် ပိတ်ပင်မှုဟာ အီဂျစ် အမေရိကန် ဆက်ဆံရေးကို ထိခိုက်စေတဲ့အတွက် အခုလို ရုပ်သိမ်းလိုက်တာ ဖြစ်ပါတယ်။
တရားရင်ဆိုင်နေရတဲ့ အမေရိကန်လူမျိုး ၇ ယောက်ကို အီဂျစ်နိုင်ငံထဲက ထွက်သွားခွင့် ပေးလိုက်ပြီလို့ ဗုဒ္ဓဟူးနေ့က အီဂျစ် တရားရေးဆိုင်ရာ အရင်းအမြစ်တွေက ပြောပါတယ်။ အဲဒီ ၇ ယောက်ထဲမှာ  ၁ ယောက်က အမေရိကန် နိုင်ငံခြားရေးဝန်ကြီး  ရေး လာဟုဒ် (Ray LaHood) ရဲ့ သားဖြစ်ပါတယ်။ တချို့တက်ကြွလှုပ်ရှားသူတွေက ကိုင်ရိုမှာရှိတဲ့ အမေရိကန်သံရုံးထဲမှာ ဒုက္ခသည်အဖြစ် ခိုလှုံနေကြပါတယ်။
နောက်ထပ် တရားမဝင်လှုပ်ရှားတယ်လို့ အစွပ်စွဲခံရတဲ့ အမေရိကန်နိုင်ငံသား ၉ ယောက်ကတော့ ခရီးသွားလာခွင့် တားမြစ်ချက် မထုတ်ခင်ကတည်းက အီဂျစ်ကနေပြီးတော့ ထွက်ခွာသွားပါတယ်။
အီဂျစ်နိုင်ငံထဲမှာ ကျန်နေတဲ့ အမေရိကန်နိုင်ငံသား တက်ကြွလှုပ်ရှားသူ ၇ ယောက်ကို နိုင်ငံထဲက ထွက်ခွာခွင့်ပေးလိုက်တဲ့သတင်းကြောင့် စိတ်အားတက်ရတယ်လို့ နိုင်ငံခြားရေးဝန်ကြီး ကလင်တန်က ပြောပါတယ်။ ဒါပေမယ့် သူတို့ရဲ့ ခရီးသွားခွင့် ရုပ်သိမ်းလိုက်တာ ဟုတ်မဟုတ်တော့ အတည်မပြုခဲ့ပါဘူး။

ကမ္ဘာကြီး ပူနွေးလာလို့ နို့တိုက်သတ္တဝါတွေ ပိုသေးငယ်လာ
By ဗွီအိုအေ (မြန်မာဌာန)
လွန်ခဲ့တဲ့နှစ်ပေါင်း ၅၅ သန်းကျော်ကစပြီးတော့ အချိန်ပိုရှည်လျားလာတဲ့ ကမ္ဘာကြီး ပူနွေးလာမှု (global warming) ကြောင့် နို့တိုက်သတ္တဝါမျိုးနွယ်တွေရဲ့ အရွယ်အစား တစထက်တစ ပိုသေး လာခဲ့တယ်လို့ သိပ္ပံအထောက်အထားတွေအရ သိရပါတယ်။ လာမယ့် ဆယ်စုနှစ်တွေမှာ ဖြစ်လာနိုင်မယ့် ရာသီဥတု လျှင်လျှင်မြန်မြန်ပြောင်းလဲမှုကို အခုခေတ် အပင်တွေနဲ့ တိရစ္ဆာန်တွေ ဘယ်လို တုံ့ပြန်ကြမလဲဆိုတာကို အမေရိကန်အခြေစိုက် သုတေသန ပညာရှင်တွေရဲ့ တွေ့ရှိချက်တွေက မေးခွန်းထုတ်နေကြတယ်လို့ ဆိုပါတယ်။ နှစ်ပေါင်း ၁၀၀ လောက်အတွင်း ပျှမ်းမျှ မျက်နှာပြင်အပူချိန်ဟာ စက်မှု မထွန်းကားခင်ခေတ်က ပမာဏထက် ၄ ဒီဂရီ စင်တီဂရိတ်လောက် မြင့်တက်လာနိုင်တယ်လို့ ရာသီဥတုတွက်ချက်မှု တော်တော်များများက ကြိုတင်ခန့်မှန်း တွက်ဆထားပါတယ်။ ပူးတွဲသုတေသန ပညာရှင်တွေရဲ့ အဆိုအရ လွန်ခဲ့တဲ့နှစ်ပေါင်း ၅၅ သန်းလောက်ကတည်းက နှစ် ပေါင်း ၁ သိန်း၊ ၇ သောင်းခွဲ ကြာမြင့်တဲ့ ဘူမိသက်တမ်းကာလအတွင်း (“dwarfing” phenomenon) လို့ခေါ်တဲ့ အရွယ်သေးငယ်သွားတဲ့ လက္ခဏာ အခြေအနေ ဖြစ်ခဲ့ပါတယ်။ အဲဒီ ဘူမိသက်တမ်း ကာလကို (PETM) လို့ ခေါ်ပြီး တော့ ပျှမ်းမျှ ကမ္ဘာ့အပူချိန်ဟာ ၅.၅ စင်တီဂရိတ်လောက် မြင့်တက်ခဲ့ပါတယ်။ ဖန်လုံအိမ် ဓာတ်ငွေ့လို့ ခေါ်တဲ့ ကာဗွန်ဒိုင်အောက်ဆိုဒ်ဓာတ်ငွေ့ ပမာဏအများကြီး ထုတ်လုပ်မှုက ကမ္ဘာ့ အပေါ်ယံလေထုထဲမှာ နေရဲ့ အပူချိန်ကိုပို  ကြာကြာသိမ်းထားနိုင်တဲ့အတွက် အဲဒီအချိန်က  ရာသီဥတုကို ပြောင်းလဲသွားစေ ခဲ့ပါတယ်။
သုတေသီတွေအဆိုအရ ရာသီဥတုပြောင်းလဲလို့ ဖြစ်ရတဲ့ အရွယ်သေးငယ်မှုဟာ လွန်ခဲ့တဲ့ နှစ် သန်း ၅၀ ကျော်က ဖြစ်ခဲ့ဖူးတော့ ရာသီဥတုပြောင်းလဲမှု Climate Change ဟာ လာမယ့် ရာစုနှစ် ၁ ခု သို့မဟုတ် ၂ ခု အတွင်း ဖြစ်နိုင်ပါတယ်။

နျူကလီးယား အစီအစဉ်တချို့ ရပ်တန့်ဖို့ မြောက်ကိုရီးယား သဘောတူ
By ဗွီအိုအေ (မြန်မာဌာန)
မြောက်ကိုရီးယားက တာဝေးပစ်ဒုံးကျည် စမ်းသပ် ပစ်လွှတ်တာတွေ၊ နျူကလီးယား စမ်းသပ် ဖောက်ခွဲတာတွေနဲ့ ယူရေနီယံ သန့်စင်ရေး အစီအစဉ်တွေကို ရပ်တန့်ဖို့ သဘောတူလိုက်တဲ့အကြောင်း အမေရိကန်ပြည်ထောင်စုက ပြောပါတယ်။
ယူရေနီယံ သန့်စင်ရေးလုပ်ငန်းတွေ ရပ်တန့်ခြင်း ရှိမရှိဆိုတာနဲ့ Yongbyon နျူကလီးယားစက်ရုံကို အမှန်တကယ် ပိတ်ပစ်လိုက်ခြင်း ရှိမရှိ ဆိုတာတွေကိုလည်း နိုင်ငံတကာက ပညာရှင်တွေ လာရောက် စစ်ဆေးခွင့်ပြုဖို့ အတွက်လည်း မြောက်ကိုရီးယားက သဘောတူလိုက်တယ်လို့ အမေရိကန် နိုင်ငံခြားရေးဝန်ကြီးဌာန ပြောခွင့်ရအမျိုးသမီး Victoria Nuland က ပြောလိုက်တာပါ။
မြောက်ကိုရီးယားနိုင်ငံမှာ အရေးပေါ်လိုအပ်နေတဲ့ စားနပ်ရိက္ခာတွေ ရရှိဖို့အတွက် မြောက်ကိုရီးယားအနေနဲ့ နျူကလီးယား လက်နက် ဖျက်သိမ်းရေးဆိုင်ရာ ဆွေးနွေးပွဲ ပြန်စဖို့ အမေရိကန်ပြည်ထောင်စုက ဖိအားပေး လုပ်ဆောင်နေတဲ့အချိန်မှာပဲ Victoria Nuland ရဲ့ ကြေညာချက် အခုလို ထွက်လာတာပါ။
ပြီးခဲ့တဲ့ သီတင်းပတ်အတွင်း မြောက်ကိုရီးယားနဲ့ တွေ့ဆုံဆွေးနွေးမှုတွေ ပြုလုပ်ခဲ့တဲ့ အမေရိကန် အထူးသံတမန် Glyn Davies ကတော့ ဆွေးနွေးမှုတွေအပေါ် ကျေနပ်အားရမှုရှိပေမဲ့ လက်တွေ့မပါဘဲ စကားအဖြစ် ပြောဆိုနေတဲ့အပေါ် သူ့အနေနဲ့ စိတ်မ၀င်စားဘူးလို့ ပြောခဲ့ပါတယ်။
အမေရိကန်ကပေးနေတဲ့ စားနပ်ရိက္ခာတွေကို စစ်တပ်နဲ့ ထိပ်သီး နိုင်ငံရေးခေါင်းဆောင်တွေထံ လွှဲပြောင်းပေးနေတယ်ဆိုတဲ့ စိုးရိမ်မှုတွေကြောင့် အမေရိကန်က မြောက်ကိုရီးယားကို ပေးနေတဲ့ စားနပ်ရိက္ခာတွေကို ၂၀၀၉ ခုနှစ်မှာ ရပ်တန့်ထားခဲ့တာပါ။

EU ဒဏ်ခတ်ပိတ်ဆို့မှု ရုပ်သိမ်းရေး ကြားဖြတ် ရွေးကောက်ပွဲပေါ် မူတည်
By မနန္ဒာချမ်း
EU ဥရောပသမဂ္ဂ အနေနဲ့ မြန်မာနိုင်ငံအပေါ် ချမှတ်ထားတဲ့ အရေးယူဒဏ်ခတ်မှုတွေကို ရုပ်သိမ်းဖို့ကိစ္စကို ဧပြီလ ၁ ရက်နေ့ ကျင်းပမယ့် ရွေးကောက်ပွဲ ပြီးတဲ့အထိ စောင့်သင့်တယ်လို့ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်က ပြောဆိုလိုက်ပါတယ်။ ဒီကနေ့ ဒေါ်အောင်ဆန်းစုကြည်နဲ့ ၁၁ ဦးပါ အာဆီယံ နိုင်ငံများနဲ့ ဆက်ဆံရေး ဥရောပပါလီမန်ရဲ့ ကိုယ်စားလှယ်အဖွဲ့တို့ နေအိမ်မှာ တွေ့ဆုံခဲ့ကြပြီးနောက် ပြုလုပ်တဲ့ သတင်းစာရှင်းလင်းပွဲမှာ ဒေါ်အောင်ဆန်းစုကြည်က အခုလို ပြောဆိုခဲ့တာပါ။ ဒါ့အပြင် ရွေးကောက်ပွဲမတိုင်ခင် မဲဆွယ် စည်းရုံးမှုကာလတွေမှာလည်း ဒီမိုကရေစီမူဝါဒတွေနဲ့ မကိုက်ညီတာတွေ ရှိတယ်လို့ ဒေါ်အောင်ဆန်းစုကြည်က ပြောဆိုခဲ့ပါတယ်။ အပြည့်အစုံကိုတော့ မနန္ဒာချမ်းက တင်ပြထားပါတယ်။
ဒေါ်အောင်ဆန်းစုကြည်ရဲ့ နေအိမ်မှာ ဒီညနေ ၄ နာရီလောက်ကပဲ အာဆီယံနိုင်ငံများနဲ့ ဆက်ဆံရေး ဥရောပ ပါလီမန်အဖွဲ့ ဥက္ကဋ္ဌဖြစ်သူ ဂျာမန် ခရစ်ယာန် ဒီမိုကရက်တစ်ပါတီရဲ့ ဥရောပပါလီမန်အမတ် ဒေါက်တာ ၀ါနာ လယ်န်ဂင် (Waener Langen) ဦးဆောင်တဲ့ ၁၁ ဦးပါ ကိုယ်စားလှယ်အဖွဲ့တို့ တွေ့ဆုံခဲ့ကြတာပါ။ ၁ နာရီကြာ တွေ့ဆုံခဲ့ကြပြီးနောက် ပြုလုပ်ခဲ့တဲ့ သတင်းစာရှင်းလင်းပွဲအတွင်း ဒေါ်အောင်ဆန်းစုကြည်က အီးယူရဲ့ အရေးယူဒဏ်ခတ်မှုတွေ ရုပ်သိမ်းရေးကိစ္စနဲ့ပတ်သက်ပြီး ရွေးကောက်ပွဲပြီးတဲ့အထိ စောင့်သင့်တဲ့အကြောင်း အခုလို ပြောဆိုခဲ့တာပါ။
“ကျမပြောခဲ့တာကတော့ ရွေးကောက်ပွဲတွေ ပြီးတဲ့အထိ စောင့်တာဟာ ကျိုးကြောင်း ဆီလျော်တယ် ဆိုတာပါ။ ကျမတို့ မမေ့သင့်တာက ၁၉၉၀ ပြည့်နှစ်မှာ ကျမတို့ ရွေးကောက်ပွဲတွေ ကျင်းပခဲ့ပြီး ကမ္ဘာက ဒါဟာ လွတ်လပ်ပြီး မျှတတယ်လို့လည်း လက်ခံခဲ့ကြပါတယ်။ ဒါပေမဲ့လည်း တစ်လပြီးတစ်လကြာလာပြီး နောက်ဆုံးမှာတော့ ရွေးကောက်ပွဲ ရလဒ်တွေက မြန်မာနိုင်ငံအတွက် ဘာမှ အပြောင်းအလဲ ဖြစ်မလာဘူး ဆိုတာပါပဲ။ ဒါကြောင့်လည်း ပိတ်ဆို့ဒဏ်ခတ်မှုတွေကို ဖယ်ရှားသင့်မသင့် ရွေးကောက်ပွဲ ပြီးတဲ့အချိန်အထိ စောင့်ပါလို့ ပြောတဲ့လူတွေအတွက် ဒါဟာ လုံးဝ ကျိုးကြောင်း ဆီလျော်ပါတယ်။”
အာဆီယံနိုင်ငံများနဲ့ ဆက်ဆံရေး ဥရောပပါလီမန်အဖွဲ့ ဥက္ကဋ္ဌဖြစ်သူ ဒေါက်တာ ၀ါနာ လယ်န်ဂင် လည်း ဒီဒဏ်ခတ်အရေးယူမှုတွေ ရုပ်သိမ်းမယ့်ကိစ္စနဲ့ ပတ်သက်ပြီး အီးယူရဲ့ သဘောထားကို ဂျာမန်ဘာသာစကားနဲ့ အခုလို ရှင်းပြခဲ့ပါတယ်။
“အီးယူအနေနဲ့ မြန်မာနိုင်ငံအပေါ် ချမှတ်ထားတဲ့ ဒဏ်ခတ်အရေးယူမှုတွေကို ရုပ်သိမ်းဖို့ဆိုတာ အကျဉ်းထောင်တွေထဲမှာ ကျန်ရှိနေတဲ့ နိုင်ငံရေး အကျဉ်းသားအားလုံး တစ်ယောက်မကျန် လွတ်မြောက်လာပြီးမှ၊ ပြီးတော့ ဧပြီလ ၁ ရက်နေ့ ကျင်းပမယ့် ရွေးကောက်ပွဲမှာ အများက မျှော်လင့်သလို လွတ်လပ်ပြီး တရားမျှတမှု ရှိမရှိဆိုတဲ့အပေါ်မှာနဲ့ အစိုးရနဲ့ တိုင်းရင်းသား လက်နက်ကိုင်တွေအကြား စစ်မှန်တဲ့ ငြိမ်းချမ်းရေး ရရှိမရှိ ဆိုတာတွေအပေါ် မူတည်ပါတယ်။