တစ်ခါတုန်းက ရသေ့ရဲ့ကျောင်းသင်္ခမ်းကို သူကြွယ်လင်မယားနဲ့သားလေးတို့ဟာ
ဆွမ်းလာကပ်လှူကြတယ်။
အဲဒီကျောင်းမှာ မိဘများကဆွမ်းကိစ္စဆောင်ရွက်နေတုန်း
သားငယ်က ကစားရင်း မြွေကိုက်ခံရတဲ့အတွက် မြွေဆိပ်တက်ပြီး
အဲဒီနေရာမှာပင် လဲကျပြီးသတိမေ့သွားပါတယ်။
မိဘများကသိပြီး သားကိုပွေ့ချီကာ ရသေ့ဆီကို ဆေးကုဖို့တောင်းပန်ကြတယ်။
ရသေ့က “ ငါက ဆေးဝါးလည်းမသိ၊ မန္တန်လည်းမတတ်ပါ”လို့ဆိုတော့
မိဘများက “အရှင်ဘုရား၊ သားလေးအပေါ် မေတ္တာထားပြီးသစ္စာဆိုပေးပါ”
လို့တောင်းပန်ပါတယ်။
ဒီတော့ ရသေ့က သစ္စာဆိုပါတယ်။
“ငါဟာ ရသေ့ရဟန်းဖြစ်တဲ့နေ့က ခုနှစ်ရက်သာပျော်မွေ့ခဲ့ပါတယ်။
နှစ်ပေါင်းငါးဆယ်လုံးလုံး ရသေ့ရဟန်းဘဝတွင် မပျော်မွေ့ဘဲနေခဲ့ရတယ်။
ဤမှန်သောသစ္စာစကားကြောင့် ဒီသူငယ်ရဲ့မြွေဆိပ်တို့ ကျဆင်းပြီး
အသက်ချမ်းသာပါစေသတည်း”
လို့သစ္စာဆိုတာနဲ့မြွေဆိပ်ဟာ ခေါင်းပိုင်းက ရင်ခေါင်းအထိကျသွားတယ်။
သူငယ်လေးဟာ သတိရလာတယ်။ မျက်တောင်ခတ်လာတယ်။
လုံးဝတော့ကောင်းမလာသေးပါ။
ဒီတော့
ရသေ့က “ငါ့အစွမ်းကဒီလောက်ပဲရှိတယ်။ အဖေလည်း သစ္စာဆိုပါဦး”
လို့တိုက်တွန်းတယ်။
ဖခင်ဖြစ်သူက…
“ ငါရဲ့အိမ်မှာ အလှူမဏ္ဍပ်ကြီးနဲ့နေ့တိုင်း လှူဒါန်းနေပါတယ်။
ငါဟာ အလှူခံများကို သဒ္ဓါတရားမရှိဘဲ
မလှူချင်ဘဲလှူနေရပါတယ်။
ဤမှန်သောသစ္စာစကားကြောင့် သားဖြစ်သူ
မြွေဆိပ်ကပျက်ပြယ်ပါစေသတည်း”
လို့ဆိုတယ်။ မြွေဆိပ်ဟာ ကျသွားတယ်။
ကလေးဟာ ခါးအထိလှုပ်ရှားနိုင်လာတယ်။
ဒါပေမယ့် လုံးဝတော့ကောင်းမလာသေးပါ။
သူကြွယ်က ဇနီးဖြစ်သူကို
သစ္စာဆိုပါဦးလို့တိုက်တွန်းတယ်။
မိခင်က
“ ငါဟာ ငါရဲ့လင်သားအပေါ်မှာ သားကိုကိုက်တဲ့မြွေဟောက်နဲ့အတူ မချစ်၊မနှစ်သက်ပါ။
ဤမှန်သောသစ္စာစကားကြောင့် ငါရဲ့သားမှ မြွေဆိပ်တို့ပျောက်ကွယ်ပါစေသတည်း”
လို့သစ္စာဆိုပါတယ်။
မြွေဆိပ်အားလုံးကျပြီး သားငယ်ဟာ ပကတိကောင်းသွားပါတယ်။
+++++++++++++++++++++++++++++++++
ကျနော်ဟာ သစ္စာကိုယုံကြည်သူဖြစ်တယ်။
အခက်အခဲဖြစ်တိုင်း သစ္စာဆိုလေ့ရှိတယ်။
အခက်အခဲတွေလည်း ပြေလည်သွားတတ်စမြဲဖြစ်တယ်။
သစ္စာဆိုတဲ့အခါမှာတော့ မှန်သောစကား၊ကောင်းသောစကားသာ
သစ္စာတည်တယ်လို့မှတ်ယူထားမိပါတယ်။
ဒါကြောင့်ကောင်းတဲ့စကား၊ မှန်တဲ့စကားကိုသာ သစ္စာပြုမိလေ့ရှိပါတယ်။
ဤပုံပြင်ကို ဖတ်မိလိုက်တော့မှ သစ္စာဆိုတာ
အဓိက အင်္ဂါရပ်က မှန်တဲ့စကားဖြစ်ဖို့သာလိုကြောင်းကို
သိခဲ့ရပါတယ်။
ကောင်းတဲ့စကားဖြစ်ဖို့မလိုကြောင်းလည်းနားလည်လာပါတယ်။
အားတက်သွားမိပါတယ်။
အကြောင်းကား...
မကောင်းတာတွေ အများအပြားလုပ်ထားမိတဲ့အတွက်ကြောင့်ဖြစ်ပါတယ်။
ပြီးတော့
ဝမ်းသာသွားမိပါတယ်။
အကြောင်းကား....
မကောင်းတာတွေကိုပါ သစ္စာဆိုလို့ရရင် ဆိုစရာသစ္စာက
များစွာရှိလာနိုင်သောကြောင့်ဖြစ်ပါတယ်။
+++++++++++++++++++++++++++++
ဒီပုံပြင်ထဲမှာပါတဲ့ ရသေ့ရယ်၊
အဖေဖြစ်တဲ့သူကြွယ်ရယ်၊
အမေရယ်ဟာ
ဘာကြောင့်များ မကောင်းတဲ့အမှုကို နှစ်ပေါင်းများစွာဟန်ဆောင်ပြီးလုပ်ခဲ့ကြသလဲ။
အဓိက အကြောင်းရင်းက လူအများကဲ့ရဲ့မှာ ရှက်လို့၊ကြောက်လို့ဆိုတာကိုပါသိလိုက်ရပါတယ်။
ဒီတော့ ကဲ့ရဲ့မှာကိုရှက်တဲ့စိတ်၊ကြောက်တဲ့စိတ်ဟာ
ကိုယ်ရဲ့ဘဝတစ်ခုလုံးအတွက် လွတ်လပ်တဲ့စိတ်ဆုံးရှုံးသွားစေခဲ့သလို
စိတ်ချမ်းသာတဲ့စိတ်ကိုလည်းပျက်စီးဆုံးရှုံးစေခဲ့ပါတယ်။
တန်သလားဆိုတာကို စဉ်းစားကြည့်တော့ မတန်ပါ။
အမှားကင်းတဲ့လူဆိုတာ မရှိပါ။
ဒီတော့ အမှားကိုအမှားမှန်းသိပြီးပြင်ဖို့သာလိုပါတယ်။
ဖုံးကွယ်ဖို့မလိုပါ။
ဟန်ဆောင်ရတဲ့အလုပ်ဟာ
အလွန်စိတ်အင်အားကုန်စေတဲ့အလုပ်ဖြစ်ပါတယ်။
အကုသိုလ်လည်းဖြစ်စေတယ်။
စိတ်ချမ်းသာမှုကို ဘာနဲ့မှမလဲသင့်ပါ။
မတန်ပါဘူး။
လွတ်လပ်တဲ့စိတ်ကို ဘာအတွက်နဲ့မှ မဆုံးရှုံးစေသင့်ပါ။
မတန်ပါဘူး။
++++++++++++++++++
No comments:
Post a Comment