အခန်း(၁)သူ .. ကွမ်းသွေးကို ပြစ် ခနဲ ထွေးလိုက်သည်။
အံတစ်ချက် ကြိတ်ရင်း ကားနောက်ပိုင်းမှ သစ်သားကုန်းဘောင် ဆီသို့ ခြေလှမ်းတို့ကို တင်လိုက်သည်။ အရေးထဲ သူ့ နဖူးမှ ချွေးတစ်စက်က မျက်လုံးထဲ ၀င်ခါနီးမို့ ခေါင်းကို ဆက်ခနဲ ခါလိုက်သည်။ သူ့ လက်ဖြင့် မသုပ်အား။ သူ့ ခါးစောင်းမှာ တင်ထားသော ဆန်အိတ်ကို လက်နှစ်ဖက်ဖြင့် ထိန်းထား ရသောကြောင့် ဖြစ်သည်။
ဒီတစ်အိတ်နှင့် ဆိုလျှင် သူ ဒီနေ့ ကားပေါ်သို့ တင်ပေးလိုက်သော ဆန်အိတ် ၉၀ ပြည့်ပြီ ဖြစ်သည်။ ခါးစောင်းပေါ်မှ ဆန်အိတ်ကို ဘုန်းခနဲ ပစ်ချပြီး သူ့ နောက်မှ တက်လာသော ကိုထွေးကို နေရာ ဖယ်ပေးလိုက်သည်။ ကိုထွေးလည်း သူ့ခါးပေါ်မှ ဆန်အိတ်ကို ပစ်ချလိုက်ပြီး သူ့ ဘက်သို့ လှည့်ပြီး ပြုံးပြသည်။ အရင်နေ့ဆိုလျှင် အလုပ်လုပ်တိုင်း ချူချူပါအောင် ညည်းတတ်သော ကိုထွေး ဒီနေ့တော့ တက်ကြွနေသည်။ ဒီနေ့အတွက် ကိုထွေးထမ်းတဲ့ ဆန်အိတ်ကတောင် ပိုများမလား ထင်ရသည်။ ကိုထွေးတင် မဟုတ်.. သူလည်းပဲ ဒီနေ့ တက်ကြွနေသည်။ အင်း.. တကယ်တော့ သူတို့ ဆန်အိတ်ထမ်းတဲ့ အလုပ်သမား တစ်ဖွဲ့လုံး ဒီနေ့ တက်ကြွနေခြင်း ဖြစ်သည်။ ဂိုထောင်ထဲမှ တာလီမှတ်သော သူဌေးလူယုံ စာရေးလေး ကိုကံခိုင်မှ လွဲလျှင် ကျန်တဲ့ သူတို့ ကုန်ထမ်းတစ်ဖွဲ့လုံး တက်ကြွနေမည် ဖြစ်ကြောင်း သူသိပါသည်။
စာရေးလေး ကိုကံခိုင်ကတော့ ဒီနေ့ သူတို့အဖွဲ့ကို သိပ်မကြည်။ သူ့ အလုပ်ချိန် မဟုတ်ဘဲ အလုပ်လုပ်နေရ သောကြောင့်ဖြစ်သည်။ တကယ်တော့ ဒီဆန်အိတ်တွေကို ကားပေါ်တင်တဲ့ အလုပ်က ညနေစောင်းမှ လုပ်ရမည် ဖြစ်သည်။ သို့ပေမယ့် သူတို့ အထမ်းသမား တစ်ဖွဲ့လုံးက ညနေထိ မစောင့်ချင်.. ။ နေခင်းမှာ အလုပ်အပြီး လုပ်ပြီး ညနေပိုင်းမှာ နားချင်သည်။ ထို့ကြောင်.. သူကိုယ်တိုင် သူဌေးကို တက်ပြောပြီး နေပူပူ လေဆူဆူမှာ ကုန်ကားနှစ်စီး ပြည့်အောင် ဆန်အိတ်တွေ ထမ်းတင်နေခြင်း ဖြစ်သည်။
သူဌေးကလည်း ပထမတော့ သဘောမကျ။ ညနေစောင်းမှ လုပ်ရမည့် အလုပ်ကို နေ့ခင်းပူပူမှာ လုပ်ဖို့ လာပြောသော အလုပ်သမားခေါင်း ကိုသိန်းကို အံ့သြနေပုံရသည်။
''ကိုသိန်းရဲ့ ... ကားက မိုးချုပ်မှ ထွက်မှာလေ။ ညနေမှ အေးအေးဆေးဆေး တင်ပေါ့။ အခု နေက ပူပါဘိနဲ့ ။ တော်ကြာ ခင်ဗျားတို့ တစ်ဖွဲ့လုံး အပူရှပ်ပြီး ဖျားနာကုန်ရင် ဒုက္ခများမယ်။ ခင်ဗျားလည်း ကျန်းမာရေးက သိပ်ကောင်းတာ မဟုတ်ဘဲနဲ့ ။ ညနေ နေအေးမှ တင်ပါ"
''ဟာ.. ရပါတယ် ဆရာ။ ကျွန်တော်တို့ အခု လုပ်ချင်လို့ပါ။ တစ်ဖွဲ့လုံးကလည်း ကျေနပ်ပါတယ်။ သူတို့လည်း အခု လုပ်ပြီး ညနေ နားချင်ပါတယ်တဲ့ ဆရာ။ ကျွန်တော်တို့ မပင်ပန်းပါဘူး .. အခု လုပ်လိုက် ပါ့မယ်နော် ဆရာ.."
''ကဲ .. ပြောမရလည်း လုပ်ပါဗျာ..။ ကိုကံခိုင်တော့ .. သူ့ အခန်းမှာ အိပ်နေတယ် ထင်တယ်.. ။ သူ့ကို နှိုးပြီး တာလီမှတ် ခိုင်းလိုက်.. ဟုတ်လား"
သူဌေးဆီက ခွင့်ပြုချက်ရတော့မှ သူ့ရင်ထဲက အလုံးကြီး ကျသွားသည်။ သူဌေးက ငြင်းလိုက်မှာကို သူစိုးရိမ် ခဲ့ရသည်။ သူတို့ တစ်ဖွဲ့လုံး နေ့ခင်းမှာ အလုပ်လုပ်ရမှ ဖြစ်မည်။ ဒါမှ ညနေပိုင်းမှာ အနားယူလို့ ရမည်ဖြစ်သည်။
သူ သူဌေးကို ကျေးဇူးတင်စွာ တစ်ချက်ပြုံးပြပြီး လှည့်အထွက် အခန်းဝ ရောက်ကာနီးမှ သူဌေးက မေးခွန်းတစ်ခု လှမ်းမေးသဖြင့် လှည့်ပြီး ပြန်ဖြေခဲ့ ရသေးသည်။
''ဒါနဲ့ ကိုသိန်းရဲ့ .. ကျုပ်နားခိုင်းရဲ့ သားနဲ့ ခင်ဗျားတို့က ဒီလောက်နေပူပူမှာ အလုပ်လုပ်ဖို့ ဘာဖြစ်လို့ လာပူဆာ နေရတာတုန်း။ ဘာလဲ .. ညနေ တစ်ဖွဲ့လုံး ကမ်းနားဆိုင်မှာ သွားသောက်ကြ မလို့လား.."
သူ ကွမ်းချိုးတက်နေတဲ့ သွားတွေ ပေါ်အောင်ပြုံးပြပြီး ခပ်သွက်သွက်လေး ပြန်ဖြေခဲ့သည်။
"မဟုတ်ပါဘူး ဆရာ.. ညနေ.. ကျွန်တော်တို့ မြန်မာအသင်း ဆီမီးဖိုင်နယ် ကန်ရမှာလေ ဆရာ။ အဲဒီပွဲကို တီဗွီကလွှင့်မှာ ဆရာရဲ့... ကျွန်တော်တို့ မြန်မာအသင်းကို အားပေးချင်လို့ပါ ဆရာ.. "
မိုးရိပ်မိုးသား မရှိတဲ့ ရန်ကုန်နေက ဒီနေ့မှ ပိုပူသည်ဟု ထင်ရသည်။ သူတို့ ကုန်ထမ်းသမား တစ်ဖွဲ့လုံးက တော့ ပူသည်ဟု မထင်..။
ညနေ မြန်မာ ဂိုးသွင်းလျှင် မြန်မာကွ ဒို့မြန်မာကွ အော်ဟစ် အားပေးဖို့သာ စိတ်ထဲမှာ စွဲနေသည်။ သူတို့ ချစ်သော မြန်မာက ပြိုင်ဘက်တွေကို အနိုင်ယူမည်ဟု သူတို့ ယုံကြည် နေကြသည်။
အခန်း (၂)
သူတို့ ကျူရှင်၏ စာသင်ခန်းကား တိတ်ဆိတ်နေသည်။
ဆရာ့ဒေါသကို တတန်းလုံး အသိမို့ ပြန်မဖြေရဲကြ ။ ဒေါသူ ပုန်ထနေသော ဆရာ့အမေးကို ပထမဆုံး ထဖြေလိုက်သူက အပြစ်အားလုံး တရားခံ ဖြစ်တော့မည်ကို သူတို့ သိသည်။ စာသင်ခုံကို ဒုန်းကနဲ ထုပြီး ဆရာက အံကြိတ်သံဖြင့် ထပ်မေးသည်။
ကဲ.. လုပ်စမ်းပါဦး .. ညနေ တစ်ခန်းလုံးက ကျောင်းသားတွေ ကျောင်းပြေးဖို့ ကိစ္စကို ဘယ်သူက စပြီး ဦးဆောင်သလဲ။ ဘယ်သူစပြီး ခေါ်သလဲ။ ငါသာ အချိန်မီ မသိရင် မင်းတို့ ကျူရှင် ပြေးကြတော့မှာ မဟုတ်လား။ ကဲ ပြောစမ်း ဘယ်သူလဲ။
ဖြေမည့်သူ မရှိ။ တကယ်တော့ ကျောင်းပြေးဖို့ ကိစ္စကို သူက စပြီး အကြံပေးခဲ့ခြင်း ဖြစ်သည်။ သူတို့ ယောက်ျားလေးတွေ အားလုံး သဘောတူသည်။ နောက်ရက်မှ ဆရာရိုက်လျင်လဲ ခံတော့မည်။ ဒီနေ့ ညနေတော့ အတန်း မတက်ဘဲ ကျူရှင်လမ်းထိပ်က လဘက်ရည်ဆိုင်မှာ ဆုံဖို့ အားလုံး သဘောတူညီ ခဲ့ကြသည်။
သို့သော် ယခု သူတို့ ကျောင်းပြေးမည့် အကြံကို ဆရာဘယ်လို သိသွားသည် မသိ။ သူတို့ ထဲက တစ်ယောက်ယောက် သစ္စာဖောက်သည်တော့ မဖြစ်နိုင်။ သူတို့ တိုင်ပင်နေတုန်း ကြားသွားသည့် ကျောင်းသူ တစ်ယောက်ယောက်က ဆရာ့ကို ချွန်တွန်းလုပ်ခြင်းသာ ဖြစ်မည်။ အခုတော့ ဆရာ့ ဒေါသက အထွတ်အထိပ်ကို ရောက်နေပြီ ဖြစ်သည်။
ရောက်မည်ပေါ့.. ယခုကျောင်းပြေးမည့် ကိစ္စတွင် အလွန်တရာ လိမ္မာ စာတော်သည်ဟု ဆရာ ယုံကြည်ထားသော ဆရာ့လက်ဆွဲတော် တရုတ်ကလေး နီတွတ်ပါ ပါဝင်နေသည် မဟုတ်လား။
ကဲ.. မပြောဘူး ဆိုရင်တော့ တစ်တန်းလုံးကို အပြစ်ပေးရလိမ့်မယ်။ မင်းတို့ မိဘတွေ အကုန်ကိုလည်း တိုင်စာပို့မယ်။ ဒါပဲ။
ဆရာအသံ ခပ်ပြတ်ပြတ် ထွက်လာသည်။ ဆရာသည် စည်းကမ်းကောင်းသော အောင်ချက်ကောင်းသော သူ့ ကျူရှင်၏ နာမည်ပျက်မှာကို စိုးရိမ်နေပုံရသည်။ မထူးတော့..။ သူ မတ်တပ်ရပ် လိုက်သည်။
''ကျွန်တော်ပါ.. ဆရာ။''
''သြော်.. ဘယ်သူများလဲ မှတ်တယ်.. ပွဲတိုင်းကျော်.. မောင်ပြည့်ဖြိုး..ကိုး"
ဆရာ့အသံက အံကြိတ်ပြီး ပြောသည်မို့ .. ခပ်ကွဲကွဲ ထွက်လာသည်။ သူတော့ မလွယ်တော့ဘူး ဆိုတာကို တွေးလိုက်မိသည်။ ရိုက်ယုံနဲ့ပဲ ပြီးပါစေ.. အိမ်ကို တိုင်စာ မပို့ပါစေနဲ့ဟု သူ ဆုတောင်း လိုက်မိသည်။
''ကျွန်တော်လည်း ပါတယ်ဆရာ.. '' .. သူ့နောက်မှ သူ့ အရင်းနှီးဆုံး သူငယ်ချင်းလှဦး အသံထွက်လာသည်။
''ကျွန်တော်ကော ဆရာ'' နောက်တစ်သံ..
"ကျွန်တော်လည်း..."
"ကျွန်တော်ပါ..."
"ကျွန်တော်..." အသံတွေ တစ်သံပြီး တစ်သံနှင့် လူတွေ တစ်ယောက်ပြီး တစ်ယောက် မတ်တပ် ထရပ်သံကို ကြားရသည်။
သူ့ သူငယ်ချင်းများ အတွက် သူ ပထမဆုံး ဂုဏ်ယူ လိုက်မိသည်။ အားလုံး ရင်ထဲတွင် တစ်စိတ်တည်း .. တစ်ခုထဲ ဖြစ်နေမည် ထင်သည်။
သူ ဆရာ အပြစ်ပေးမည်ကို မကြောက်တော့ .. မိဘတိုင်စာ ပို့မည်ကိုလည်း မပူတော့။ သူ့မှာ သူငယ်ချင်းများစွာ ရှိပါသည်။
''ကျွန်တော်တို့ ညနေ ဘောလုံးပွဲ ကြည့်ချင်လို့ပါ ဆရာ.. ညနေမှာ မြန်မာအသင်း အကြိုဗိုလ်လုပွဲ ကန်ရမှာပါ ဆရာ..။ အုပ်စုပွဲတွေ တုန်းကလည်း ကျူရှင်ချိန်မို့ ကျွန်တော်တို့ မကြည့်လိုက်ရ ပါဘူး.. အခု ဒီပွဲကိုတော့ ကျွန်တော်တို့ အလွတ်မခံချင် လို့ပါ ဆရာ.. ။ ကျွန်တော်တို့ရဲ့ မြန်မာအသင်းကို အားပေးချင်လို့ပါ ဆရာ"
ရည်ရွယ်မထားဘဲ .. သူ့ ပါးစပ်က တရစပ် ဆရာ့ကို ရှင်းပြနေမိသည်။ အရင်ကတော့ ဆရာဒီလို ဒေါသထွက်လျှင် ပြန်ပြောရဲဖို့ နေနေသာသာ နားရွက်ပင် လှုပ်ရဲ ခဲ့သည်မဟုတ်..။ အခုတော့ သူ့ သူငယ်ချင်းတွေ ကြောင့်လား.. မြန်မာပွဲကို ကြည့်ချင်သည် ကြောင့်လားတော့ မသိ..။ ဆရာ့ကို သူ ပြောပြောနေမိပြီ ဖြစ်သည်။
သူ့ အဖြေဆုံးတော့ .. ဆရာ့ ရယ်သံ တဟားဟားကို ကြားရသည်။ ဆရာ ခွက်ထိုးခွက်လန် ရယ်သည်။ ဘာကြောင့်မှန်း မသိ။
"ဒါများကွာ.. စောစော ကတည်းက ဆရာ့ကို လာပြောရောပေါ့။ ငါက မင်းတို့ကို တားမယ် ထင်လို့လား.. ဟေ့.. ဒီမှာ ကြည့်စမ်း..။ ငါလည်း မြန်မာပါကွ။ ကိုယ့်မြန်မာအသင်း ကန်တဲ့ပွဲကို မြန်မာ တစ်ယောက်က မကြည့်ချင်ဘဲ နေမတဲ့လား။ မကြည့်ခိုင်းဘဲ နေမတဲ့လား။ ဒီမယ်ငါကဖြင့် .. မင်းတို့နဲ့ အတူတူ ဘောလုံးပွဲ ကြည့်ရအောင် အောက်ထပ်က အခန်းထဲမှာ တီဗွီတွေ ဘာတွေတောင် ပြင်ထားပြီးပြီကွ။ ညနေ စာမသင်ဘူး။ ဘောလုံးပွဲ ကြည့်မယ်။ စောစော ကတည်းက စီစဉ်ပြီးသား။ ကဲ.. ဘောလုံးပွဲ မကြည့်ချင်တဲ့ သမီးတွေက ညနေ ကျူရှင်ပိတ်တယ် ဟုတ်လား"
"ဟေး..." ကနဲ အော်လိုက်သည့် အသံက သူတို့ ကျူရှင်တစ်ခုလုံး ညံထွက်သွားသည်။ သူ့ သူငယ်ချင်းတွေ အားလုံး မျက်ရည်လယ် ကုန်သည်အထိ ပျော်သည်။ ဆရာ့ကို လှမ်းကြည့်လိုက်တော့ မြန်မာပွဲ ကြည့်ရမှာမို့ ပျော်နေသည့် တပည့်တွေကို ကြည့်ရင်း ဆရာကိုယ်တိုင် မျက်ရည်လည် နေသည်ကို တွေ့ရသည်။
တပည့်ပဲဖြစ်ဖြစ် ဆရာပဲဖြစ်ဖြစ်.. မြန်မာအသင်း ကိုတော့ ချစ်ကြသည်။
အခန်း (၃)
''ဒီမယ် ကျုပ်ကားက အောက်ကားမဟုတ်ဘူး။
အထိအခိုက် အတိုက်အခိုက်လည်း မဖြစ်ဖူးဘူး။
ဆေးကလည်း အော်။ မော်ဒယ်လ်ကလည်း ခင်ဗျားအမြင်။ ကျုပ် ဒီပွဲစားတန်းမှာ ဘယ်လို ပွဲစားဆိုတာ ခင်ဗျားလည်း အသိ... ဟုတ်လား။
အဲဒီတော့ ကျုပ်ပြောတဲ့ ဈေးကို သဘောတူတယ် ဆိုရင် နေ့လည် ၂နာရီ မထိုးခင် ကျုပ်ဆီကို ရောက်အောင်လာပြီး စရံသတ်။ ၂နာရီ ကျော်လို့ကတော့ ခင်ဗျားကျုပ်ကို ဆယ်သိန်းတိုးပေးလည်း ခင်ဗျားကို ကျုပ်ကား မရောင်းတော့ဘူး ဟုတ်လား..။ ကျုပ် သုံးနာရီ မထိုးခင် အိမ်ပြန်ရောက်မှ ဖြစ်မယ်။ ခင်ဗျားကို ပွဲစားတန်းမှာ ငုတ်တုတ်ထိုင် မစောင့်နေနိုင်ဘူး။ ဒီနေ့ မြန်မာ ဆီမီးဖိုင်နယ်ပွဲ ရှိတယ်။ အဲဒီအချိန်မှ ကျုပ်ကို အလုပ်ကိစ္စ လာမပြောနဲ့ ဟုတ်လား..။ သိန်းတစ်ရာ မြတ်လည်း ကျုပ်အဲဒီ အလုပ်ကို စကားမပြောဘူး။ ဟုတ်လား။''
ခပ်စပ်စပ်ပြောပြီး ဖုန်းချလိုက်သော ပွဲစားကြီး ကိုငွေ ကိုကြည့်ပြီး ကားပွဲစားတန်း လဘက်ရည်ဆိုင်က လုပ်ဖော်ကိုင်ဖက်တွေ မျက်လုံးပြူး ကုန်သည်။ ကိုငွေမှ ဟုတ်ပါရဲ့လား အံ့သြကုန်ခြင်း ဖြစ်သည်။
ပွဲစားကြီးကိုငွေ ဆိုတာက အလုပ်လုပ်လျှင် ရိုးသားသူ၊ မှန်ကန်သူ၊ ကတိတည်သူ၊ စကား အပြောကောင်းပြီး စိတ်ရှည်သူ အဖြစ် နာမည်ကြီးသူ ဖြစ်သည်။ ထို့ပြင် ပိုက်ဆံရမည့် အလုပ်ဆိုရင် ဘယ်တော့မှ ငြင်းဆန်ဖူးသူ မဟုတ်။
အခုတော့ မြန်မာပွဲ ကြည့်ရန် သိန်းတစ်ရာ ရလည်း မလုပ်ဟု ဆိုချေပြီ။
တစ်ဆိုင်လုံး၏ အံ့သြသော မျက်လုံးတွေကို တစ်ချက်ဝေ့ကြည့်ရင်း ကိုငွေက ရှက်အမ်းအမ်းဖြင့် စကားဆိုသည်။
''အဟဲ.. ကျုပ်တို့ မြန်မာက စိတ်ဓာတ် သိပ်ကောင်းတာဗျ.. ဒီကောင်တွေက ခြေသာပေမယ့် ကျုပ်တို့ မြန်မာက စိတ်ဓာတ်သာတယ်။ ဒီနေ့ပွဲကတော့ ကြည့်ကောင်းပြီ ပေါ့ဗျာ''...
အခန်း (၄)
သူ ဒီနေ့ စိတ်ပင်ပန်းသည်။
အို... ဒီနေ့တင်မဟုတ်.။ သူ့အလုပ်က နေ့တိုင်း စိတ်ပင်ပန်းသည်သာ ဖြစ်သည်။
မီဒီယာ အလုပ်က ကမ္ဘာပေါ်မှာ စိတ်အပင်ပန်းဆုံးအလုပ် ဟု သူ စာအုပ်ထဲမှာ ဖတ်ဖူးသည်။ ဒါ အမှန်ပဲဖြစ်သည်။
သတင်းဆိုတာက မှန်ဖို့ လိုသလို မြန်ဖို့လည်း လိုသည်။
သတင်းတစ်ပုဒ်ကို အစရရင် ရေကုန်ရေခန်းလိုက်။ အစီအစဉ် တကျနှင့် ပြည့်စုံအောင်ရေးပြီး အယ်ဒီတာထံ တင်ပေးရသည်။
မပြည့်စုံသော သတင်း၊ အချက်အလက် မှားသော သတင်းများ တင်မိလျှင် အယ်ဒီတာက မိုးမွှန်အောင် ဆဲဆိုဦးမည်။
အင်္ဂါရပ် ပြည့်စုံသော သတင်းကောင်း တစ်ပုဒ် ရဖို့အတွက် အချိန်တွေ အများကြီးပေးပြီး ရေးမိလို့ သတင်းတင်ဖို့ နောက်ကျပြီ ဆိုလျှင်တော့ အယ်ဒီတာက နားရင်းပါးရင်းပါ တီးတတ်သေးသည်။ ကိုယ့်ကို အစစအရာရာ သင်ကြား ပြသနေသော ဆရာမို့ အယ်ဒီတာကိုလည်း အပြစ်မဆိုရဲ။ ပြောသမျှခံ လုပ်သမျှ ခံရသည်သာ ဖြစ်သည်။ အယ်ဒီတာကလည်း သူ့ထက် အဆပေါင်းများစွာသော တာဝန်တွေ ယူထားရသည် မဟုတ်လား။ သူတို့ ဂျာနယ်တိုက်မှာ သတင်းထောက်ချည်း အယောက် ၂၀လောက် ရှိလေသည်။
အခုလည်း မန္တလေး သံဃာတော်တွေ ဆန္ဒထုတ်ဖော်သည့် သတင်းကို နောက်ဆက်တွဲ သတင်းတွေ ရေးဖို့ အယ်ဒီတာက ခိုင်းထားသည်။
နောက်ဆက်တွဲ သတင်းတွေ ရေးရတာက မလွယ်။ သာမာန်ထက် ပိုခက်သလို ရှိသည်။ ဖြစ်ဖြစ်ချင်း ကာလမှာ သူတို့ သတင်းဌာနကော အခြားသတင်း ဌာနတွေပါ စပ်ရပ်သတင်း အဖြစ် သူ့ ထက်ငါဦးအောင် တင်ပြထားပြီးသား သတင်းဖြစ်သည်။ အခြား သတင်းဌာန တွေကလည်း နောက်ရက်မှာ သတင်း ဓာတ်ပုံတွေနဲ့ ဝေေ၀ဆာဆာ ဖော်ပြထားပြီးသား သတင်းဖြစ်သဖြင့် ယခု သူရေးရသည့် နောက်ဆက်တွဲ သတင်းဆောင်းပါးက မလွယ်။ သူများနှင့် တင်ဆက်ပုံခြင်း မတူသည့် သတင်းကို ရေးရမည် မဟုတ်ပါလား။ သူတို့ သတင်းတိုက်၏ ပုံစံအတိုင်း ဒီသတင်းကို အခြား သတင်းဌာနတွေနှင့် မတူအောင် နောက်ခံ အဖြစ်အပျက်.. အခြေအနေ.. နောက်ထပ် ဆက်လက် ဖြစ်ပွားဖွယ်ရာ ရှိသည်များကိုပါ ခန့်မှန်း တင်ဆက်ပေးရမည် ဖြစ်သည်။
ဒီသတင်းကို ပြီးအောင်ရေးရင် ဒီညနေ မြန်မာပွဲကို လွတ်တော့မည်။ ပြီးချင်ဇော အားကြီးနေသဖြင့် သတင်းရေးရတာ ပိုပြီး စိတ်ဖိစီးရသည်။ သူ့ စိတ်ထဲမှာက ကျော်ကိုကို၊ ကျော်ဇေယျာဝင်း၊ အေးဆန်း၊ ကျော်ဇင်ထက်၊ သီဟစည်သူနှင့် နည်းပြကြီး ဟန်ဆန်တို့သာ ရောက်နေသည်။ သတင်းထဲမှာ ပါသည့် သံဃာတွေနဲ့ မန္တလေး ပြည်သူတွေကို အာရုံဝင်စားလို့မရ။ ခက်ပြီ။
ရေးပြီးသား သတင်း စာရွက်ကိုကြည့်ပြီး စိတ်ဓာတ်က ကျပြီးရင်း ကျလာသည်။ သူ လုပ်နိုင်ပါ့မည်လား။ ယခင် သံဃာတော်တွေ ဆန္ဒပြဖူးသော ရွှေဝါရောင် တော်လှန်ရေး မှတ်စုစာအုပ်ကို တစ်ချက်ပြန်လှန် ကြည့်လိုက်၊ လက်ရှိ ဆန္ဒပြပွဲနှင့် ပတ်သက်သည့် တားမြစ်ထားသော အခြေခံ ဥပဒေပါ အချက်အလက် တွေကို ကြည့်လိုက်ဖြင့် သူ စိတ်ရှုတ်လာသည်။ မဖြစ်နိုင်တော့။ သူ စာအုပ်ကို ပစ်ချလိုက်ရင် အပြင်သို့ ထွက်လာခဲ့သည်။ ဘောလုံးပွဲက စတော့မည်။ ဖြစ်ချင်ရာဖြစ်.. ဘောလုံးပွဲပြီးတော့မှ ဒီသတင်းကို စိတ်အေးလက်အေး ရေးတော့မည်ဟု သူစဉ်းစားလိုက်ရင်း ဘောလုံးပွဲ ပြသသည့် လဘက်ရည်ဆိုင်သို့ ခြေဦးလှည့်လိုက်သည်။
ဒီသတင်းကို စိတ်အေးလက်အေး ရေးဖို့အတွက် .. ဒီနေ့ ဆီမီးဖိုင်နယ်မှာ မြန်မာနိုင်ဖို့ကလည်း လိုသေးသည်။
မြန်မာအသင်းများ မပြောကောင်း မဆိုကောင်း ရှုံးနိမ့်ခဲ့လျှင် သတင်းရေးဖို့ စိတ်ပါမည် မဟုတ်တော့ဟု တွေးရင်း မြန်မာနိုင်ပါစေဟု စိတ်ထဲက ဆုတောင်း လိုက်သေးသည်။
ဆုတောင်းရင်းမှ သူတစ်ခုကို တွေးလိုက်မိသည်။ သူသည် ဘာလို့ မြန်မာ အသင်းကို ဒီလောက် နိုင်စေချင်သည်လဲ။ ဘာလို့ မြန်မာအသင်းကို ဒီလောက် ချစ်သည်လဲ။ ရှင်းပါသည်။ သူသည် မြန်မာတစ်ယောက် ဖြစ်နေသောကြောင့် ဖြစ်သည်။ မြန်မာတိုင်း မြန်မာအသင်းကို ချစ်ကြလိမ့်မည်။ ထို့ကြောင့် သံဃာ့ ဆန္ဒပြပွဲ သတင်းအစား မြန်မာအသင်းကို ချစ်တဲ့ မြန်မာပြည်သူတွေ အကြောင်းကို သတင်းဆောင်းပါး တစ်ခုလောက် ရေးချင်လာသည်။ ဒါဆိုလျှင်တော့ ရေးရတာ လက်တွေ့လိမ့်မည်။ သူ့တို့ စာဖတ်ပရိသတ် တွေလည်း နှစ်သက်ကြလိမ့်မည်။ အယ်ဒီတာကကော... ။ အယ်ဒီတာလည်း သဘောကျမည်ဟု ထင်ပါသည်။.
အဘယ့်ကြောင့် ဆိုသော် အယ်ဒီတာလည်း မြန်မာတစ်ယောက် ဖြစ်နေသောကြောင့် ဖြစ်သည်။
မြန်မာစစ်စစ်တိုင်း မြန်မာအသင်းကို ချစ်ကြလေသည်။
(ဆီးဂိမ်းစ် ဆီမီးဖိုင်နယ်ရောက် မြန်မာအသင်း အတွက် ခံစားရေးဖွဲ့ပါသည်)
လင်းရောင်
ပရိသတ်ထံမှ ပေးပို့လာသည့် ဆောင်းပါးအား ဖော်ပြပေးထားခြင်း ဖြစ်ပါသည်။
No comments:
Post a Comment